स्टार भारत वाहिनीवर प्रसारित होत असलेल्या कामधेनु गौमाता या पौराणिक मालिकेत अभिनेत्री नेहा परदेशी राधाची भूमिका साकारत आहे. प्रेम सागर आणि शिव सागर यांच्या सागर वर्ल्ड मल्टिमिडियाद्वारे निर्मित या मालिकेत राधा ही केवळ भूमिका नाही, तर एक अध्यात्मिक आणि भावनिक प्रतीक म्हणून सादर केली जात आहे.
नेहा परदेशी म्हणाली की या भूमिकेसाठी तिच्यासमोर शारीरिक रूपांतरणाची प्रक्रिया जितकी महत्त्वाची होती, त्याहून अधिक कठीण होती भाषेची, विशेषतः बोली आणि संवाद सादरीकरणाची. "खरं सांगायचं तर दोन्ही गोष्टींमध्ये वेगवेगळ्या प्रकारचं आव्हान असतं, पण मला सर्वात कठीण वाटलं ते म्हणजे भाषेचं बारकाव्यानिशी सादरीकरण. कारण हे फक्त शब्द उच्चारणं नाही, तर त्या शब्दामागची भावना पोचवणं आहे," ती म्हणाली.
पौराणिक किंवा ऐतिहासिक कथानकात संवाद ही फक्त गोष्ट नसते, ती श्रद्धा, परंपरा आणि भक्तीचं प्रतिबिंब असते. "प्रत्येक संवादात दिव्यता आणि गहनता असावी लागते. तो फक्त उच्चारायचा नसतो—तो अनुभवायचा असतो," नेहा स्पष्ट करते.
संवाद पाठ करणं एक गोष्ट आहे, पण त्या कालखंडाशी प्रामाणिक राहून आणि आजच्या प्रेक्षकांपर्यंत पोहोचेल अशा प्रकारे त्याला मांडणं ही वेगळीच कसोटी असते. "शब्द योग्य प्रकारे पोहोचले नाहीत, तर संपूर्ण सादरीकरण अधुरं वाटतं," ती पुढे म्हणाली.
नेहा सांगते की, शारीरिक बदल — जड पोशाख, दागिने, डोक्यावरील अलंकार—हे करताना देखील त्या व्यक्तिमत्त्वाची शांती आणि स्थिरता राखणं हेही आव्हानात्मक होतं. पण तिला वाटतं की त्या व्यक्तिरेखेचं खरं अस्तित्व तिच्या भाषेत आहे. "जर संवाद मनापासून आले नाहीत, तर राधा म्हणून वाटणारी गूढता आणि संयम व्यक्त करता येत नाही."
"राधा हा एक सामान्य पात्र नाही. ती भक्ती, प्रेम आणि समर्पणाचं प्रतीक आहे. शूटिंगदरम्यान मी तिच्या भावनांमध्ये पूर्णपणे झपाटून गेलेली असते. पण शूटिंग संपल्यावर स्वतःला नेहा म्हणून परत आणणंही तितकंच गरजेचं असतं," नेहा स्पष्ट करते.
"मी ध्यान, डायरी लिहिणं, शांत बसणं अशा गोष्टींच्या माध्यमातून स्वतःला स्थिर ठेवते. कारण राधा ही शाश्वत आहे, आणि मी फक्त तिचं माध्यम आहे. या भूमिकेतून मला खूप काही शिकायला मिळालं आहे—विशेषतः तिचं संयम, श्रद्धा आणि भक्ती या गुणांचं मूल्य."